Pulot-gata Ng Kalabaw At Kristyanismo Sa Daigdig Ng Social Media

Hindi pa sumasapit ang Semana Santa nang maisip ko ang isyu na ito. Nagising na lang ako isang umaga taglay ang mapanghing realisasyon na idinulot unti-unti ng nagbabagong teknolohiya na kung tawagin ng mga teknorata ay social media -- ang pagsasa-himpapawid ng tamis, asim at pait na iniaalay nito, tumutulay sa mga kurdon ng kultura at relihiyon.

May nalalabag ba itong panuntunan ng Kristyanismo? May nabundol kaya itong behikulo ng kamalayang wasto? O sadya lamang bang nagsasa-hunyanggo talaga ang kalabaw pag nawisikan ng kaunting tunaw na ginto sa kanyang balat?

Sa ibaba ay makikita natin ang "Mga Pitong Mapanganib at Nakamamatay na Kasalanan" o sa wikang Ingles, "The Seven Deadly Sins". Ang mga ito ay isang klasipikasyon at pag-uuri ng mga hindi kanais-nais at nakakahindik na bisyo ng tao na ginamit diumano ng mga sinaunang Kristyano para turuan ang sanlibutan na lumayo sa pagkakasala.

LUST - Ang kalibugan ay di lamang ukol sa makamundong pagnanasa ng katawang lupa, bagkus ay pagnanasa din para sa kuwarta, katanyagan at kapangyarihan.
GLUTTONY - katakawan at pagdaramot; ang sobrang pagnanais sa pagkain at pagwawaldas nito, na kadalasang nagdudulot ng kawalan para sa mga nangangailangan.
GREED - sobrang pag-ibig sa materyal na posesyon; ang pagnanakaw, panlalamang sa kapwa, manipulasyon ng mga awtoridad ay manipestasyon din ng pagka-gahaman.
SLOTH - katamarang pisikal at espiritwal; ang pagwawalang-bahala sa mga dapat gawin na wasto, daan tuloy nito ay ang pagpasok ng kademonyuhan sa sarili.
WRATH - galit at paghihiganti; galit, sa kanyang pinakadalisay na porma, katampalasanan, karahasan, at poot na nagiging sanhi ng alitan.
ENVY - pagkainggit; katulad sa selos na nababalot ng pakiramdam ng kawalang-kasiyahan patungkol sa kanyang sariling ugali, katayuan, kakayahan, o premyo. Kadalasang dulot nito ay hindi makontrol na pagnanais at pagiimbot.
PRIDE - kayabangan at pagmamagaling; isinasaalang-alang bilang siyang orihinal at pinaka-seryoso sa mga pitong nakamamatay na kasalanan, at ang pinagmulan ng iba pa. Ito ay nakikilala bilang isang pagnanais na maging mas mahalaga o kaakit-akit kaysa sa iba, ang pagtangging kilalanin ang mabuting gawa ng iba, at ang labis na pag-ibig ng sarili.

Pagninilay-nilay. Paggunita. Pagdambana. Pagdalangin.
Ang pag-asa na nawa'y hindi ka bumulusok sa patibong ng pulot-gata ng kalabaw at Kristyanismo.

Wakas